തിരുനാവായ: 2027-ല്‍ നടക്കാനിരിക്കുന്ന ചരിത്രപ്രസിദ്ധമായ തിരുനാവായ മഹാമാഘ മഹോത്സവത്തിന്റെ ഒരുക്കങ്ങള്‍ക്ക് തിരുനാവായയുടെ മണ്ണില്‍ തുടക്കമാകുമ്പോള്‍, ആത്മീയ കേന്ദ്രങ്ങളില്‍ വന്‍ ചര്‍ച്ചയായി പ്രമുഖ സന്യാസവര്യന്റെ മാറിനില്‍ക്കല്‍. ജുന അഖാഡ മഹാമണ്ഡലേശ്വര്‍ സ്വാമി ആനന്ദവനം ഭാരതി കേരളത്തിലെ മഹാമാഘ സംഘാടകരുമായി വഴിപിരിയുന്നുവെന്നാണ് സൂചന. മഹോത്സവത്തിന്റെ ക്രിയാ പദ്ധതികള്‍ തയ്യാറാക്കുന്നതിന് മുന്നോടിയായി നടന്ന ചരിത്രപ്രസിദ്ധമായ അഷ്ടമംഗല പ്രശ്‌നത്തില്‍ അദ്ദേഹം പങ്കെടുക്കാതിരുന്നത് ഇതിന്റെ വ്യക്തമായ സൂചനയാണെന്നാണ് പുറത്തുവരുന്ന വിവരം.
ഉത്തരേന്ത്യന്‍ കുംഭമേളകളില്‍ മലയാളികളുടെ വന്‍ പങ്കാളിത്തം ഉറപ്പാക്കുന്നതിലും മഹാകുംഭമേളയെ അതിബൃഹത്തായ വിജയമാക്കുന്നതിലും നിര്‍ണായക പങ്കുവഹിച്ച മലയാളി സന്യാസവര്യനാണ് സ്വാമി ആനന്ദവനം ഭാരതി. മുന്‍പ് കോഴിക്കോട് അദ്ദേഹത്തിന് നല്‍കിയ വലിയ സ്വീകരണ യോഗത്തില്‍ സനാതന ധര്‍മ്മത്തിന്റെ കാവല്‍ഭടന്മാരാകാന്‍ അദ്ദേഹം ആഹ്വാനം ചെയ്തിരുന്നു. അങ്ങനെയുള്ള പ്രമുഖ സന്യാസിശ്രേഷ്ഠന്‍ മഹാമാഘത്തിന്റെ തുടക്കത്തില്‍ തന്നെ സംഘാടകരുമായി അകലുന്നത് ആത്മീയ-സാംസ്‌കാരിക മേഖലകളില്‍ വലിയ ചര്‍ച്ചകള്‍ക്ക് വഴിവെച്ചിട്ടുണ്ട്.
ആരാണ് ആനന്ദവനം സ്വാമി? എസ്.എഫ്.ഐ നേതാവില്‍ നിന്ന് മഹാമണ്ഡലേശ്വരിലേക്ക്
സംഘടനാ പ്രവര്‍ത്തനത്തില്‍ നിന്ന് മാധ്യമപ്രവര്‍ത്തനത്തിലേക്കും അവിടെ നിന്ന് ആധ്യാത്മികതയുടെ പാതയിലേക്കുമായിരുന്നു മഹാകുംഭമേളയില്‍ മഹാമണ്ഡലേശ്വരായി അവരോധിക്കപ്പെട്ട സ്വാമി ആനന്ദവനം ഭാരതിയുടെ വഴികള്‍. തൃശൂര്‍ ചാലക്കുടി അന്നനാട് സ്വദേശിയാണ് സ്വാമി ആനന്ദവനം ഭാരതി. പൂര്‍വാശ്രമത്തില്‍ സലില്‍ എന്നായിരുന്നു പേര്. ഇരിങ്ങാലക്കുട ക്രൈസ്റ്റ് കോളേജില്‍ നിന്ന് പ്രീ-ഡിഗ്രിയും തൃശൂര്‍ ശ്രീ കേരളവര്‍മ കോളേജില്‍ നിന്ന് പൊളിറ്റിക്കല്‍ സയന്‍സില്‍ ബിരുദവും ബിരുദാനന്തര ബിരുദവും നേടി.
കോളേജ് പഠനകാലത്ത് ജില്ലയിലെ എസ്.എഫ്.ഐയുടെ പ്രമുഖ നേതാവായിരുന്നു ഇദ്ദേഹം. എസ്.എഫ്.ഐ ജില്ലാ വൈസ് പ്രസിഡന്റ്, കേരളവര്‍മ കോളേജ് യൂണിറ്റ് സെക്രട്ടറി, തൃശൂര്‍ ഏരിയാ പ്രസിഡന്റ്, ഇരിങ്ങാലക്കുട ഏരിയാ വൈസ് പ്രസിഡന്റ് എന്നീ നിലകളില്‍ പ്രവര്‍ത്തിച്ചു. കേരള മീഡിയ അക്കാദമിയില്‍ നിന്ന് ജേര്‍ണലിസം പൂര്‍ത്തിയാക്കിയ അദ്ദേഹം കൊച്ചിയില്‍ ദീര്‍ഘകാലം മാധ്യമപ്രവര്‍ത്തകനായി പ്രവര്‍ത്തിച്ചിട്ടുണ്ട്. മാധ്യമ രംഗം വിട്ടതിന് ശേഷം മീഡിയ അക്കാഡമി അസിസ്റ്റന്റ് എഡിറ്ററായും പ്രവര്‍ത്തിച്ചിരുന്നു. ഇതിനുശേഷമാണ് ആത്മീയ മേഖലയിലേക്കുള്ള പ്രവേശം. 2019-ല്‍ പ്രയാഗ് കുംഭമേളയില്‍ അഖാഡയില്‍ നിന്നാണ് നാഗദീക്ഷ സ്വീകരിച്ചത്. കൊട്ടാരക്കര അവധൂത് ആശ്രമത്തില്‍ നിന്നും ദീക്ഷ സ്വീകരിച്ചിട്ടുണ്ട്.
ആവശ്യമായ മാര്‍ഗനിര്‍ദേശങ്ങള്‍ നല്‍കി അഖാഡയുടെ പ്രവര്‍ത്തനങ്ങളെ നയിക്കുക എന്ന ദൗത്യമാണ് മഹാമണ്ഡലേശ്വര്‍ക്കുള്ളത്. ധര്‍മ പ്രചരണത്തിനും ധര്‍മ സംരക്ഷണത്തിനുമായുള്ള അഖാഡയുടെ പ്രവര്‍ത്തനങ്ങള്‍ കേരളം കേന്ദ്രമാക്കി ദക്ഷിണ ഭാരതത്തിലുടനീളം വ്യാപിപ്പിക്കാനുള്ള നിയോഗമായാണ് ഈ സ്ഥാനത്തെ കാണുന്നതെന്ന് സ്വാമി ആനന്ദവനം ഭാരതി വ്യക്തമാക്കിയിട്ടുണ്ട്. കുംഭമേളയില്‍ മലയാളികളുടെ സാന്നിധ്യം ഉറപ്പാക്കുന്നതില്‍ സ്വാമിയുടെ നേതൃത്വത്തിലുള്ള പ്രവര്‍ത്തനങ്ങള്‍ വലിയ ശ്രദ്ധ നേടിയിരുന്നു.
അഷ്ടമംഗല പ്രശ്‌നവും ഒരുക്കങ്ങളും
അതേസമയം, മഹാമാഘ മഹോത്സവത്തിന് മുന്നോടിയായുള്ള അഷ്ടമംഗല പ്രശ്‌നം നാവാമുകുന്ദ ക്ഷേത്രത്തിന് സമീപത്തെ അഷ്ടമംഗല ഭൂമിയില്‍ അതീവ ഭക്തിനിര്‍ഭരമായ അന്തരീക്ഷത്തില്‍ ആരംഭിച്ചു. രാവിലെ ഒമ്പതുമണിയോടെ സ്വര്‍ണ്ണം വെച്ചുകൊണ്ട് ആരംഭിച്ച പ്രശ്‌നചിന്തയില്‍ മകരം രാശിയാണ് തെളിഞ്ഞത്. ദൈവാനുഗ്രഹവും ദൈവാധീനവും പ്രകടമാകുന്ന ഫലമാണിതെന്ന് വൈദികര്‍ വ്യക്തമാക്കുന്നു. തടസ്സങ്ങളെല്ലാം അതിജീവിച്ച് മഹാമാഘം വിജയകരമായി പൂര്‍ത്തിയാക്കാന്‍ സാധിക്കുമെന്ന ആദ്യ ഫലസൂചനകളാണ് പ്രശ്‌നത്തില്‍ നിന്നും ലഭിച്ചത്.
ബഡാ ഉദാസീന്‍ അഖാഡ മഹാമണ്ഡലേശ്വര്‍ സ്വാമി സന്തോഷ് ആനന്ദ് ദേവ്ജി മഹാരാജ്, ആഞ്ജനേയാശ്രമം മഠാധിപതി സ്വാമി ഹനുമദ്പാദാനന്ദ സരസ്വതി, മാര്‍ഗ്ഗനിര്‍ദ്ദേശക മണ്ഡലം കേരളാ സെക്രട്ടറി സ്വാമി സത്സരൂപാനന്ദ സരസ്വതി, സ്വാമി ആത്മസ്വരൂപാനന്ദ, സ്വാമി മണ്ഡലേശ്വര്‍ പ്രഭാകരാനന്ദ സരസ്വതി, ദണ്ഡി സ്വാമി സാധുകൃഷ്ണാനന്ദ തുടങ്ങി നിരവധി പ്രമുഖ സന്യാസിമാരുടെയും സംഘാടകരുടെയും സാന്നിധ്യത്തിലാണ് അഷ്ടമംഗല പ്രശ്‌നം ആരംഭിച്ചത്.
ഇത്തവണത്തെ ചരിത്രപ്രസിദ്ധമായ തിരുനാവായ മഹാമാഘ മഹോത്സവം 28 ദിവസങ്ങളിലായി വിപുലമായ രീതിയില്‍ ആഘോഷിക്കാനാണ് അഷ്ടമംഗല പ്രശ്‌നത്തില്‍ അന്തിമ തീരുമാനമായിരിക്കുന്നത്. 16 പ്രമുഖ ആചാര്യന്മാര്‍ പങ്കെടുത്ത പ്രശ്‌നചിന്തയില്‍ മഹോത്സവത്തിന്റെ ആചാരപരമായ ക്രമീകരണങ്ങളെയും ചടങ്ങുകളെയും സംബന്ധിച്ച നിര്‍ണായക വഴികാട്ടലുകള്‍ ഉരുത്തിരിഞ്ഞു വന്നു. വിവിധ സന്യാസ മഠങ്ങളുടെ പ്രതിനിധികളും ചടങ്ങില്‍ സജീവമായി പങ്കെടുത്തു.
മഹോത്സവത്തോടനുബന്ധിച്ച് ഭാരതപ്പുഴയുടെ (നിള) തീരത്ത് ആകെ എട്ട് സ്‌നാനഘട്ടങ്ങള്‍ തയ്യാറാക്കും. ഗംഗ, യമുന തുടങ്ങിയ സപ്ത പുണ്യ നദികളുടെ സങ്കല്‍പ്പത്തില്‍ നിളയുടെ മറുകരയിലാണ് സ്‌നാനഘട്ടങ്ങള്‍ ഒരുക്കുക. കൂടാതെ, ത്രിവേണി സംഗമ സങ്കല്‍പ്പത്തില്‍ നാവാമുകുന്ദ ക്ഷേത്രത്തിന് സമീപമായി പ്രത്യേക നിളാ സ്‌നാനഘട്ടവും സ്ഥാപിക്കും. നദീ ഉത്സവമെന്ന നിലയില്‍ പഞ്ചഭൂതാത്മകമായ ആചാര ക്രമവും ചാന്ദ്രമാസത്തെ ആസ്പദമാക്കിയുള്ള കര്‍മ്മങ്ങളുമാണ് നടപ്പിലാക്കുക.
മഹോത്സവത്തില്‍ പങ്കെടുക്കാനെത്തുന്ന വിവിധ സന്യാസി പരമ്പരകള്‍ക്കായി പ്രത്യേക പര്‍ണ്ണശാലകള്‍ തീര്‍ക്കും. സന്യാസി സമൂഹത്തിന് യാതൊരുവിധത്തിലുള്ള പരിഗണനക്കുറവും ഉണ്ടാകരുതെന്ന് അഷ്ടമംഗല പ്രശ്‌നത്തില്‍ പങ്കെടുത്ത ആചാര്യന്മാര്‍ പ്രത്യേകമായി നിര്‍ദ്ദേശിച്ചിട്ടുണ്ട്. കൂടാതെ, മഹാമാഘ ഭൂമിയില്‍ കാലകാലങ്ങളില്‍ നടന്നിട്ടുള്ള ബ്രഹ്‌മഹത്യാപാപം ഉള്‍പ്പെടെയുള്ള ദോഷങ്ങള്‍ക്ക് പ്രത്യേക പരിഹാരക്രിയകള്‍ ചെയ്യാനും ആചാര്യന്മാര്‍ നിര്‍ദ്ദേശം നല്‍കി.
മുന്‍ ശബരിമല മേല്‍ശാന്തിയും സംഘാടക സമിതി ചെയര്‍മാനുമായ എ.കെ. സുധീര്‍ നമ്പൂതിരി, തിരൂര്‍ ദിനേഷ്, മധു മേനോന്‍, രാജേഷ് വര്‍മ്മ, സജീഷ് പൊന്മള, രവിനാഥ് ഇന്ദ്രപ്രസ്ഥം, സുബി കൃഷ്ണ, പ്രദീപ് തവനൂര്‍, സുരേഷ് തൃക്കണ്ടിയൂര്‍, ജയകുമാര്‍ കോട്ടയ്ക്കല്‍, വി.എന്‍. ജയകൃഷ്ണന്‍, രമ ഷാജി തുടങ്ങിയ പ്രമുഖ വ്യക്തിത്വങ്ങളും ചടങ്ങുകളില്‍ പങ്കെടുത്തു.
ഏറ്റവും അടുത്ത ദിവസങ്ങളില്‍ തന്നെ ആവശ്യമായ ക്രിയാപദ്ധതികള്‍ തയ്യാറാക്കി നിര്‍മ്മാണ പ്രവര്‍ത്തനങ്ങളും മറ്റ് അടിസ്ഥാന സൗകര്യ ഒരുക്കങ്ങളും ആരംഭിക്കുമെന്ന് സംഘാടക സമിതി അറിയിച്ചു. ആചാരശുദ്ധിയോടെയും പ്രകൃതിക്ക് ഇണങ്ങുന്ന പരിസ്ഥിതി സൗഹൃദ രീതിയിലുമായിരിക്കും മഹോത്സവം സംഘടിപ്പിക്കുക. നിളാ തീരത്ത് എത്തുന്ന ലക്ഷക്കണക്കിന് ഭക്തജനങ്ങള്‍ക്കായി വിപുലമായ സുരക്ഷാ-ഗതാഗത ക്രമീകരണങ്ങളാകും ഏര്‍പ്പെടുത്തുക.
സ്വാമി ആനന്ദവനം ഭാരതിയുടെ മാറിനില്‍ക്കല്‍ ഉയര്‍ത്തുന്ന ചോദ്യങ്ങള്‍ ഒരുവശത്ത് നിലനില്‍ക്കുമ്പോഴും, വൈദിക ശ്രേഷ്ഠരുടെ സാന്നിധ്യത്തില്‍ പ്രശ്‌നചിന്ത പൂര്‍ത്തിയാക്കി മഹാമാഘ മഹോത്സവത്തിന് ഒരുങ്ങുകയാണ് തിരുനാവായ. നാടിന്റെ സാംസ്‌കാരിക പൈതൃകവും ആത്മീയ ചൈതന്യവും വിളിച്ചോതുന്ന ഈ വമ്പന്‍ ഉത്സവം കേരളത്തിന്റെ സാംസ്‌കാരിക രംഗത്ത് പുതിയൊരു അധ്യായം കുറിക്കുമെന്ന പ്രതീക്ഷയിലാണ് ഭക്തജനങ്ങള്‍.
