കൊല്ലം: പത്തനാപുരത്തിന്റെ ‘ഗ്ലാമര്’ എം.എല്.എയും മന്ത്രിയുമായ കെ.ബി. ഗണേഷ് കുമാറിന് ശനിദശ തുടരുന്നു. വാളകത്തെ വീട്ടിലെ അവിഹിത ആരോപണങ്ങളും കുടുംബപ്രശ്നങ്ങളും സൃഷ്ടിച്ച കരിനിഴല് വിട്ടുമാറും മുന്പേ സോളാര് ഗൂഢാലോചന കേസിലും മന്ത്രിക്ക് കോടതിയില് നിന്ന് തിരിച്ചടി നേരിട്ടു. തിരഞ്ഞെടുപ്പ് വരെ വിചാരണ നീട്ടിവയ്ക്കണമെന്ന ആവശ്യം കൊട്ടാരക്കര മജിസ്ട്രേറ്റ് കോടതി തള്ളിയതോടെ, അതിവേഗ വിധി വരുമോ എന്ന ഭീതിയിലാണ് മന്ത്രി ക്യാമ്പ്.
തിരഞ്ഞെടുപ്പ് കാലത്ത് കോടതി നടപടികള് തുടരുന്നത് തനിക്ക് രാഷ്ട്രീയമായി ദോഷം ചെയ്യുമെന്ന ഗണേഷിന്റെ വാദം കോടതി അംഗീകരിച്ചില്ല. രാഷ്ട്രീയ കാരണങ്ങള് പറഞ്ഞ് നീതിപീഠത്തിന്റെ നടപടികള് തടസ്സപ്പെടുത്താനാവില്ലെന്ന് കോടതി വ്യക്തമാക്കിയതോടെ ഗണേഷിന്റെ തന്ത്രങ്ങള് പാളി. വിചാരണ വേഗത്തില് പൂര്ത്തിയാക്കി വിധി വന്നാല് അത് ഗണേഷിന്റെ മന്ത്രിസ്ഥാനത്തിനും വരാനിരിക്കുന്ന തിരഞ്ഞെടുപ്പ് സാധ്യതകള്ക്കും വലിയ ഭീഷണിയാകും.
വാളകത്തെ വിവാദങ്ങളും ‘5000 പ്രണയങ്ങളും’ ഇത് ഗണേഷിന് വലിയ തലവേദനയാണ്. നിലവില് വാളകത്തെ വീട്ടിലെ അവിഹിത ആരോപണങ്ങള് ഗണേഷിനെ രാഷ്ട്രീയമായി പ്രതിരോധത്തിലാക്കിയിട്ടുണ്ട്. ഭാര്യയുമായുള്ള തര്ക്കങ്ങള് പരിഹരിച്ചുവെന്ന് അവകാശപ്പെടുമ്പോഴും, വ്യക്തിജീവിതത്തിലെ ഇത്തരം കാര്യങ്ങള് പൊതുമധ്യത്തില് ചര്ച്ചയാകുന്നത് തിരിച്ചടിയാണ്. ‘5000 പ്രണയങ്ങള്’ ഉണ്ടെന്ന മട്ടിലുള്ള പരസ്യമായ പ്രഖ്യാപനങ്ങള് സ്ത്രീ വോട്ടര്മാര്ക്കിടയില് ഗണേഷിന്റെ പ്രതിച്ഛായയ്ക്ക് മങ്ങലേല്പ്പിച്ചതായി രാഷ്ട്രീയ നിരീക്ഷകര് കരുതുന്നു. ഇതിനിടയിലാണ് സോളാര് കേസിലെ ഗൂഢാലോചനയും വിചാരണയും വരുന്നത്.
സോളാര് കേസിലെ പരാതിക്കാരിയുടെ കത്തില് ഉമ്മന് ചാണ്ടിക്കെതിരെ വ്യാജമായി പേജുകള് കൂട്ടിച്ചേര്ക്കാന് ഗണേഷ് കുമാര് ഗൂഢാലോചന നടത്തിയെന്ന ഗൗരവകരമായ ആരോപണമാണ് കേസിലുള്ളത്. ‘ഉമ്മന് ചാണ്ടിയെ ലൈംഗികാരോപണ കേസില് കുടുക്കും’ എന്ന് ഗണേഷ് പറഞ്ഞിരുന്നതായി അദ്ദേഹത്തിന്റെ മുന് പേഴ്സണല് സ്റ്റാഫ് നല്കിയ മൊഴി കോടതിയില് നിലനില്ക്കുന്നത് മന്ത്രിക്കു വിനയാകും. വിചാരണയില് ഇതുവരെ വന്ന മൊഴികളെല്ലാം ഗണേഷിന് എതിരായ സാഹചര്യത്തിലാണ് നടപടികള് നീട്ടിവയ്ക്കാന് അദ്ദേഹം അറ്റകൈ പ്രയോഗം നടത്തിയത്.
സോളാര് കേസില് അന്തരിച്ച നേതാവ് ഉമ്മന് ചാണ്ടി വേട്ടയാടപ്പെട്ടുവെന്ന സഹതാപതരംഗം ജനങ്ങള്ക്കിടയില് ശക്തമാണ്. ഈ സാഹചര്യത്തില് ഗണേഷ് കുമാര് പ്രതിക്കൂട്ടിലാകുന്നത് യു.ഡി.എഫിന് വലിയൊരു രാഷ്ട്രീയ ആയുധമാകും. പത്തനാപുരത്തെ വോട്ട് ബാങ്കില് വിള്ളല് വീഴ്ത്താന് ഈ നിയമപോരാട്ടം കാരണമാകുമോ എന്നാണ് രാഷ്ട്രീയ കേരളം ഉറ്റുനോക്കുന്നത്.
