തൃശ്ശൂര്: സൂര്യന് കത്തിയെരിയുന്ന മീനച്ചൂടിനേക്കാള് ഭീകരമായ അഗ്നിനാളങ്ങള് മുണ്ടത്തിക്കോടിനെ ശ്മശാനമാക്കി മാറ്റി. തൃശ്ശൂര് പൂരത്തിന് വാനില് വര്ണ്ണവിസ്മയം തീര്ക്കാന് കരുതിവെച്ചിരുന്ന തിരുവമ്പാടി വിഭാഗത്തിന്റെ അയ്യായിരം കിലോ കരിമരുന്നാണ് ഉച്ചവെയിലില് പൊട്ടിത്തെറിച്ചത്. ഈ മാസം 24-ന് നടക്കേണ്ട സാമ്പിള് വെടിക്കെട്ടിനായി പരുവപ്പെടുത്തിയ രണ്ടായിരത്തോളം കിലോ സ്ഫോടകവസ്തുക്കളും ഇതില്പ്പെടും. ആകാശപ്പൂരത്തിന് മുന്പേ മുണ്ടത്തിക്കോടിന്റെ മണ്ണില് കരിമരുന്ന് ചോര നനഞ്ഞ പൂരമായി മാറി.
വെയില് ചുട്ടുപൊള്ളുന്ന ഉച്ചയ്ക്ക് 2.30-ഓടെയാണ് ആദ്യത്തെ ഇടിമുഴക്കം കേട്ടത്. പിന്നാലെ തുടര്ച്ചയായ സ്ഫോടനങ്ങള്. പൂരപ്രേമികളുടെ ഹൃദയമിടിപ്പായ അയ്യായിരം കിലോ കരിമരുന്ന് ഒന്നാകെ അഗ്നിനാളങ്ങളെ ഏറ്റുവാങ്ങിയപ്പോള് ഭൂമി പിളരുന്ന ശബ്ദമാണ് ഉണ്ടായതെന്ന് നാട്ടുകാര് പറയുന്നു. സ്ഫോടനത്തിന്റെ ആഘാതത്തില് കിലോമീറ്ററുകള് ദൂരെയുള്ള വീടുകളുടെ ജനല്ചില്ലുകള് തകര്ന്നു വീണു. കെട്ടിടങ്ങള്ക്ക് വിള്ളലേല്ക്കുകയും ഓടുകള് തെറിച്ചു വീഴുകയും ചെയ്തതോടെ പ്രദേശം യുദ്ധഭൂമിക്ക് സമാനമായി.
കേരളത്തെ ചുട്ടുകൊല്ലുന്ന കനത്ത ചൂടാണ് അപകടത്തിന്റെ ആഘാതം വര്ദ്ധിപ്പിച്ചത്. വെടിക്കെട്ട് പുരയ്ക്കുള്ളിലെ കരിമരുന്നിന്റെ രാസപ്രവര്ത്തനത്തിന് ചൂട് ആക്കം കൂട്ടിയോ എന്ന് വിദഗ്ധര് സംശയിക്കുന്നു. പരിക്കേറ്റവര്ക്ക് പൊള്ളലിന്റെ ആഘാതം വര്ദ്ധിപ്പിക്കാനും ഈ ഉഷ്ണതരംഗം കാരണമായി. വെടിക്കെട്ട് ലൈസന്സി മുണ്ടത്തിക്കോട് സതീശന് ഉള്പ്പെടെയുള്ളവര്ക്ക് ഗുരുതരമായി പൊള്ളലേല്ക്കുമ്പോള് ആ കത്തുന്ന വെയിലില് അവരെ രക്ഷിക്കാന് പോലും ഉറ്റവര്ക്ക് കഴിഞ്ഞില്ല.
ദുരന്തത്തിന്റെ വ്യാപ്തി കണക്കിലെടുത്ത് പാലക്കാട്, തൃശ്ശൂര് ജില്ലകളിലെ മുഴുവന് ഫയര് യൂണിറ്റുകളും മുണ്ടത്തിക്കോട്ട് കേന്ദ്രീകരിച്ചിരിക്കുകയാണ്. ആറ് സ്റ്റേഷനുകളില് നിന്നുള്ള അഗ്നിശമനസേനാംഗങ്ങള് ജീവന് പണയം വെച്ചാണ് കത്തുന്ന പുരകള്ക്ക് അടുത്തേക്ക് നീങ്ങിയത്. രക്ഷാപ്രവര്ത്തനത്തിനായി ഇരുജില്ലകളിലെയും മുഴുവന് പോലീസ് ഉദ്യോഗസ്ഥരോടും സംഭവസ്ഥലത്തേക്ക് എത്താന് ഡിജിപി റവാഡ ചന്ദ്രശേഖര് ഉത്തരവിട്ടു.
ആരോഗ്യവകുപ്പ് മന്ത്രി വീണാ ജോര്ജ് നേരിട്ട് ഇടപെട്ട് മെഡിക്കല് കോളേജിലും ജനറല് ആശുപത്രിയിലും ‘മാസ് കാഷ്വാലിറ്റി’ സജ്ജമാക്കി. പരിക്കേറ്റവര്ക്ക് വിദഗ്ദ്ധ ചികിത്സ ഉറപ്പാക്കാന് സ്വകാര്യ ആശുപത്രികള്ക്കും നിര്ദ്ദേശം നല്കിയിട്ടുണ്ട്. കനിവ് 108 ആംബുലന്സുകള് തൃശ്ശൂര് റോഡുകളില് ചീറിപ്പായുകയാണ്. തൃശ്ശൂര് ഡിഐജി സംഭവസ്ഥലത്തെത്തി രക്ഷാപ്രവര്ത്തനങ്ങള്ക്ക് നേരിട്ട് നേതൃത്വം നല്കുന്നു.
പൂരനഗരിയില് അമൈറ്റും കുഴിമിന്നലുമായി ആവേശം വിതറേണ്ടിയിരുന്ന ആ അയ്യായിരം കിലോ കരിമരുന്ന് ഇപ്പോള് മുണ്ടത്തിക്കോടിന്റെ മണ്ണില് കരിയും പുകയുമായി മാറിയിരിക്കുന്നു. ഇത്രയേറെ സ്ഫോടകവസ്തുക്കള് ശേഖരിച്ച വെടിപ്പുരയില് സുരക്ഷാ മാനദണ്ഡങ്ങള് പാലിക്കപ്പെട്ടിരുന്നോ എന്ന ചോദ്യം ഉയരുന്നുണ്ടെങ്കിലും, കേരളം ഇപ്പോള് പ്രാര്ത്ഥനയിലാണ്; ആ ആശുപത്രി കട്ടിലുകളില് ജീവനായി മല്ലിടുന്നവര്ക്ക് വേണ്ടി.
