തൃശ്ശൂര്: മുണ്ടത്തിക്കോട്ടെ പടക്കപ്പുരയിലുണ്ടായ ഉഗ്രസ്ഫോടനത്തെക്കുറിച്ച് പെട്രോളിയം ആന്ഡ് എക്സ്പ്ലോസീവ്സ് സേഫ്റ്റി ഓര്ഗനൈസേഷന് നടത്തുന്ന നിരീക്ഷണങ്ങള് ഗൗരവകരമായ ചില സൂചനകളാണ് നല്കുന്നത്. അന്തരീക്ഷത്തിലെ ചൂട് മാത്രം ഇത്തരമൊരു സ്ഫോടനത്തിന് കാരണമാകില്ലെന്നും, ഷോട്ട് സര്ക്യൂട്ട് സാധ്യതകള് തള്ളിക്കളയാനാവില്ലെന്നുമാണ് അവരുടെ നിലപാട്. ഇലക്ട്രിക്കല് ഇന്സ്പെക്ട്രേറ്റിന്റെ പരിശോധന പൂര്ത്തിയാകുന്നതോടെ മാത്രമേ സ്പാര്ക്ക് ഉണ്ടായത് എവിടെ നിന്നാണെന്ന് കൃത്യമായി പറയാനാകൂ. സ്ഫോടനത്തിന് പിന്നില് മറ്റെന്തെങ്കിലും അസ്വാഭാവിക കാരണങ്ങളുണ്ടോ എന്നതില് സമഗ്രമായ അന്വേഷണം വേണമെന്ന ആവശ്യം ഇതോടെ ശക്തമായിരിക്കുകയാണ്.
ദുരന്തത്തില് തിരിച്ചറിഞ്ഞ ഒന്പത് മൃതദേഹങ്ങളില് എട്ടു പേരുടേയും ഭൗതികശരീരം ബന്ധുക്കള്ക്ക് വിട്ടുനല്കി. അവസാന യാത്ര ചൊല്ലാന് പോലും കഴിയാത്ത വിധം വികൃതമായ മൃതദേഹങ്ങള് കണ്ട് വിറങ്ങലിച്ചു നില്ക്കുകയാണ് ഒരു നാട് മുഴുവന്. കിലോമീറ്ററുകളോളം പ്രകമ്പനം കൊണ്ട പ്രദേശത്ത് ഇന്നും ഭീതിയുടെ കരിനിഴല് വീണുകിടക്കുന്നു. കാണാതായവരെക്കുറിച്ചുള്ള ദുരൂഹതകള് നീങ്ങാന് ഡി.എന്.എ പരിശോധനാ ഫലം വരുന്നത് വരെ കാത്തിരിക്കേണ്ട അവസ്ഥയാണ്.
ദുരന്തത്തിന്റെ പശ്ചാത്തലത്തില് പടക്കനിര്മ്മാണ മേഖലയിലെ അവിശുദ്ധ കൂട്ടുകെട്ടുകളെക്കുറിച്ചും അധികൃതര് അന്വേഷണം തുടങ്ങിയിട്ടുണ്ട്. ഇതിന്റെ ഭാഗമായി പാലക്കാട് മുതലമടയിലെ പടക്ക നിര്മ്മാണശാലയ്ക്ക് സ്റ്റോപ്പ് മെമ്മോ നല്കി. തൃശൂര് പൂരത്തിനായി പാറമേക്കാവിന് വേണ്ടി വെടിക്കെട്ട് നടത്തുന്നത് ഇവരാണ്. പാലക്കാട് കളക്ടറുടെ നിര്ദ്ദേശപ്രകാരം ചിറ്റൂര് തഹസില്ദാറാണ് നടപടി സ്വീകരിച്ചത്. കോട്ടയം സ്വദേശിയുടെ ഉടമസ്ഥതയിലുള്ള ഈ സ്ഥാപനം നിലവില് പോലീസ് കാവലിലാണ്. ലൈസന്സുകള് നല്കുന്നതിലും പരിശോധനകള് നടത്തുന്നതിലും ഉദ്യോഗസ്ഥര് കാട്ടുന്ന ഉദാസീനത കൂടി ഈ അന്വേഷണത്തിന്റെ പരിധിയില് വരണമെന്നാണ് ഉയരുന്ന ആവശ്യം.
സുരക്ഷാ മാനദണ്ഡങ്ങള് കാറ്റില് പറത്തിയാണ് പല വെടിക്കെട്ട് പുരകളും പ്രവര്ത്തിക്കുന്നതെന്ന് ജസ്റ്റിസ് പി.എസ്. ഗോപിനാഥന് ഉയര്ത്തിയ വിമര്ശനം ഭരണകൂടത്തിനുള്ള താക്കീതാണ്. പുറ്റിങ്ങല് ദുരന്തം പഠിച്ച കമ്മീഷന് എന്ന നിലയില് അദ്ദേഹം പങ്കുവെച്ച ആശങ്കകള് കേരളം ഗൗരവത്തോടെ കാണണം. ആചാരങ്ങളുടെ പേരില് മനുഷ്യജീവനെ ഹോമിക്കുന്ന രീതിക്ക് ഇനിയെങ്കിലും അറുതി വരുത്തേണ്ടതുണ്ട്. സ്ഫോടകവസ്തുക്കള് കൈകാര്യം ചെയ്യുന്നതില് സംഭവിച്ച വീഴ്ചകളെക്കുറിച്ച് ഉന്നതതല അന്വേഷണം നടന്നേ തീരൂ.
വെടിക്കെട്ടുകളില് ശബ്ദത്തിനും വീര്യത്തിനും അമിത പ്രാധാന്യം നല്കുന്നത് നിരോധിക്കണം. വെടിക്കെട്ടുകളെ കാഴ്ചയുടെ വിരുന്നായി മാത്രം കണ്ട്, അപകടരഹിതമായ മാര്ഗ്ഗങ്ങളിലേക്ക് മാറാന് ദേവസ്വങ്ങളും സംഘാടകരും തയ്യാറാകണമെന്ന നിര്ദ്ദേശം ശക്തമാണ്. ഓരോ അപകടം നടക്കുമ്പോഴും പരിശോധനകള് കര്ക്കശമാക്കുമെന്ന് പ്രഖ്യാപിക്കുന്ന സര്ക്കാര്, പിന്നീട് അതെല്ലാം വിസ്മരിക്കുകയാണ് പതിവ്. മുണ്ടത്തിിക്കോട്ടെ ഈ 14 ജീവനുകള് അവസാനത്തെ രക്തസാക്ഷികളാകണം. മരിച്ചവരുടെ കുടുംബങ്ങള്ക്ക് അര്ഹമായ നഷ്ടപരിഹാരവും പരിക്കേറ്റവര്ക്ക് മികച്ച ചികിത്സയും സര്ക്കാര് ഉറപ്പാക്കണം. മുണ്ടത്തിക്കോടിന്റെ മണ്ണില് വീണ ഈ ചോരക്കറ, അധികാരികളുടെ കണ്ണുതുറപ്പിക്കാന് പ്രേരിപ്പിക്കട്ടെ എന്ന പ്രാര്ത്ഥനയിലാണ് കേരളം.
