മറുനാട്ടിലെ ചുട്ടുപൊള്ളുന്ന വെയിലില് വിയര്പ്പൊഴുക്കി സമ്പാദിച്ചതാണ് ആ ബാഗിലുണ്ടായിരുന്നതെല്ലാം. വിലപ്പെട്ട രേഖകള്, അധ്വാനത്തിന്റെ വിഹിതം. പക്ഷേ, വിമാനമിറങ്ങി മിനിറ്റുകള്ക്കുള്ളില് അത് നഷ്ടപ്പെട്ടു. പ്രവാസി കുടുംബം ആകെ തകര്ന്നുപോയ നിമിഷം. എന്നാല് അവര് അറിഞ്ഞില്ല, തങ്ങള്ക്ക് പിന്നാലെ കാവല് മാലാഖമാരായി കേരള പോലീസ് ഉണ്ടെന്ന്!
റാന്നി സ്വദേശി എബ്രഹാം മാത്യുവിനും കുടുംബത്തിനുമാണ് ആ ദുരനുഭവം ഉണ്ടായത്. തിങ്കളാഴ്ച രാവിലെ നെടുമ്പാശ്ശേരിയില് വിമാനമിറങ്ങി ആലുവയിലേക്ക് മെട്രോ ഫീഡര് ബസ്സില് പോകുന്നതിനിടെയാണ് ബാഗ് മോഷണം പോയത്. ബാഗ് നഷ്ടപ്പെട്ടെന്ന് തിരിച്ചറിഞ്ഞതോടെ എബ്രഹാം പകച്ചുപോയി. പ്രതീക്ഷകള് അസ്തമിച്ച ആ നിമിഷം അവര് നേരെ പോയത് എയര്പോര്ട്ട് പോലീസ് ലെയ്സണ് ഓഫീസറുടെ അടുത്തേക്കാണ്.
പരാതി കിട്ടിയ നിമിഷം എസ്.ഐ സാബു വര്ഗീസ് ആക്ഷനിലേക്ക് കടന്നു. ഓരോ സെക്കന്ഡും വിലപ്പെട്ടതായിരുന്നു. ഫീഡര് ബസ്സിലെ സിസിടിവി ദൃശ്യങ്ങള് അരിച്ചുപെറുക്കി. വിരുതനായ കള്ളന് ബാഗുമായി ആലുവയില് ഇറങ്ങുന്നത് ക്യാമറയില് പതിഞ്ഞു. എയര്പോര്ട്ടിലെ ക്യാമറകള് കൂടി പരിശോധിച്ചതോടെ പ്രതി എത്തിയ വാഹനത്തിന്റെ സൂചന ലഭിച്ചു. ഡിജിറ്റല് തെളിവുകള് പോലീസ് തോളോടുതോള് ചേര്ത്ത് ഉപയോഗിച്ചു.
ഫോണ് സ്വിച്ച് ഓഫ് ചെയ്ത് ഫോര്ട്ട് കൊച്ചിയില് സുരക്ഷിതനായി ഒളിച്ചിരിക്കുകയായിരുന്നു പ്രതി. പക്ഷേ, ഡിജിറ്റല് ലൊക്കേഷനുകളുടെ സഹായത്തോടെ പോലീസ് ആ പ്രദേശം വളഞ്ഞു. രക്ഷയില്ലെന്ന് ഉറപ്പായതോടെ ബാഗുമായി പ്രതി കീഴടങ്ങി. കൃത്യം 12 മണിക്കൂര്! അതിനുള്ളില് ആ പ്രവാസിയുടെ ആധി പോലീസ് മാറ്റി.
ലോക്നാഥ് ബെഹ്റയും എസ്.പി ഹേമലതയും എസ്.ഐ സാബു വര്ഗീസിന് പ്രശസ്തി പത്രം നല്കുന്നു. എബ്രഹാം മാത്യുവിന്റെ സന്തോഷം നിറഞ്ഞ മുഖം)
കൊച്ചി മെട്രോ എം.ഡി ലോക്നാഥ് ബെഹ്റയും ആലുവ റൂറല് എസ്.പി എം. ഹേമലതയും നേരിട്ടെത്തിയാണ് പോലീസിന്റെ ഈ മിന്നല് വേഗതയെ അഭിനന്ദിച്ചത്. എസ്.ഐ സാബു വര്ഗീസിന് ആദരമായി പ്രശസ്തി പത്രം നല്കി. പ്രവാസിയുടെ സ്വപ്നങ്ങള്ക്ക് കാവല് നിന്ന ഈ പോലീസുകാര്ക്ക് നെടുമ്പാശ്ശേരിയിപ്പോള് ഹൃദയം കൊണ്ട് കൈയ്യടിക്കുകയാണ്.
