മോഹന്ലാലിന്റെ അടുത്ത സുഹൃത്തായിരുന്നു സിജെ റോയ്. കോണ്ഫിഡന്റ് ഗ്രൂപ്പുമായുള്ള ബന്ധം ലാലും തുറന്നു പറഞ്ഞിട്ടുണ്ട്. ഏഷ്യാനെറ്റിനും പ്രധാന സ്പോണ്സറായിരുന്നു. അതുകൊണ്ട് തന്നെ റോയിയുടെ മരണം ലാലിനും ഏഷ്യാനെറ്റിനും ഞെട്ടലായി. തൃശൂര് ഗുരുവായൂര് സ്വദേശിയായ റോയ് ജനിച്ചു വളര്ന്നത് ബെംഗളുരുവിലാണ്.
മോഹന്ലാലിന്റെ ഉറ്റസുഹൃത്ത്, ഏഷ്യാനെറ്റിന്റെ കരുത്തനായ പങ്കാളി, റിയല് എസ്റ്റേറ്റ് ലോകത്തെ കിരീടം വെക്കാത്ത രാജാവ്സി.ജെ. റോയിയുടെ വിയോഗം കേരളത്തിലെ ചലച്ചിത്ര-മാധ്യമ-വ്യവസായ ലോകത്തെ ഒരുപോലെ അനാഥമാക്കിയിരിക്കുകയാണ്. ആത്മവിശ്വാസം കൊണ്ട് സാമ്രാജ്യങ്ങള് കെട്ടിപ്പടുത്ത ഒരു 56-കാരന്റെ അപ്രതീക്ഷിത മടക്കം വലിയൊരു സൗഹൃദവലയത്തിനാണ് തീരാനഷ്ടമാകുന്നത്.
സൂപ്പര് താരം മോഹന്ലാലിന്റെ അടുത്ത സുഹൃത്തായിരുന്നു ഡോ. സി.ജെ. റോയ്. കോണ്ഫിഡന്റ് ഗ്രൂപ്പുമായി ലാലിനുള്ള ആത്മബന്ധം പലപ്പോഴും അദ്ദേഹം തന്നെ തുറന്നുപറഞ്ഞിട്ടുണ്ട്. സിനിമയ്ക്കപ്പുറം വളര്ന്ന ആ സൗഹൃദം പല വലിയ പ്രോജക്ടുകള്ക്കും വഴിതുറന്നു. ‘മരക്കാര്’, ‘കാസനോവ’ തുടങ്ങിയ ബ്രഹ്മാണ്ഡ ചിത്രങ്ങളുടെ നിര്മ്മാണത്തില് റോയ് പങ്കാളിയായതും ലാലിനോടുള്ള ഈ കരുത്തുറ്റ ബന്ധം കൊണ്ടായിരുന്നു. പ്രിയ സുഹൃത്തിന്റെ വേര്പാട് മോഹന്ലാലിനെ സംബന്ധിച്ചിടത്തോളം വ്യക്തിപരമായ ഒരു ആഘാതമാണ്.
മലയാളികളുടെ പ്രിയപ്പെട്ട ചാനലായ ഏഷ്യാനെറ്റിനും റോയ് ഒരു ബിസിനസ് പങ്കാളി മാത്രമായിരുന്നില്ല. ‘ഐഡിയ സ്റ്റാര് സിംഗര്’, ‘ബിഗ് ബോസ്’ തുടങ്ങിയ ജനപ്രിയ പരിപാടികളുടെ പ്രധാന സ്പോണ്സര് എന്ന നിലയില് ചാനലിന്റെ വളര്ച്ചയില് അദ്ദേഹം വലിയ പങ്കുവഹിച്ചു. റോയിയുടെ വിയോഗം ചാനല് അധികൃതരെയും ഞെട്ടലിലാഴ്ത്തിയിരിക്കുകയാണ്. തൃശ്ശൂര് ഗുരുവായൂര് സ്വദേശിയാണെങ്കിലും ബെംഗളൂരുവിലായിരുന്നു റോയിയുടെ വളര്ച്ച. മെക്കാനിക്കല് എന്ജിനീയറിങ് ബിരുദത്തിന് ശേഷം സ്വിറ്റ്സര്ലന്ഡിലെ എസ്.ബി.എസ് ബിസിനസ് സ്കൂളില് നിന്ന് ബിസിനസ് അഡ്മിനിസ്ട്രേഷനില് ഡോക്ടറേറ്റ് നേടിയ അദ്ദേഹം, എച്ച്പി (HP) പോലുള്ള ബഹുരാഷ്ട്ര കമ്പനിയിലെ ഉയര്ന്ന ജോലി ഉപേക്ഷിച്ചാണ് ബിസിനസിലേക്ക് എത്തിയത്. 2006-ല് തുടങ്ങിയ കോണ്ഫിഡന്റ് ഗ്രൂപ്പ് കേരളത്തിലും ബെംഗളൂരുവിലും റിയല് എസ്റ്റേറ്റ് വിപ്ലവം തന്നെ സൃഷ്ടിച്ചു.
റിയല് എസ്റ്റേറ്റില് തുടങ്ങി ഹോസ്പിറ്റാലിറ്റി, ഏവിയേഷന്, വിനോദം, വിദ്യാഭ്യാസം തുടങ്ങി വിവിധ മേഖലകളിലേക്ക് റോയ് തന്റെ സാമ്രാജ്യം വ്യാപിപ്പിച്ചു. കേരളത്തിലെ പ്രമുഖരായ പല വ്യക്തികളും സി.ജെ. റോയിയുടെ ബിസിനസ് സംരംഭങ്ങളില് വന്തോതില് നിക്ഷേപം നടത്തിയിട്ടുണ്ട്. അദ്ദേഹത്തിന്റെ അപ്രതീക്ഷിത ആത്മഹത്യ ഈ നിക്ഷേപകര്ക്കും വലിയ ആശങ്കയും ഇരുട്ടടിയുമാണ് നല്കിയിരിക്കുന്നത്.
കോണ്ഫിഡന്റ് ഗ്രൂപ്പിലൂടെ റിയല് എസ്റ്റേറ്റ് മേഖലയില് ആധിപത്യം സ്ഥാപിച്ച റോയ്, കേരളത്തിലെ സിനിമാ മേഖലയിലും ശക്തമായ സാന്നിധ്യമായിരുന്നു. നിരവധി ചിത്രങ്ങള് നിര്മ്മിച്ചതിന് പുറമെ, പല പ്രോജക്റ്റുകളും സുഗമമായി റിലീസ് ചെയ്യുന്നതിനായി നിര്മ്മാതാക്കളെയും വിതരണക്കാരെയും അനൗദ്യോഗികമായി സഹായിക്കുന്നതിലും അദ്ദേഹം പ്രശസ്തനായിരുന്നു. കോണ്ഫിഡന്റ് ഗ്രൂപ്പ് ഒറ്റയ്ക്ക് നിര്മ്മിച്ച ചിത്രങ്ങളില് മോഹന്ലാലിന്റെ കാസനോവ , മരക്കാര്: അറബിക്കടലിന്റെ സിംഹം എന്നിവ റിലീസ് സമയത്തെ ഏറ്റവും ചെലവേറിയ മലയാള സിനിമകളായിരുന്നു. മോഹന്ലാലിന്റെ താരമൂല്യം കാരണം ഈ രണ്ട് ചിത്രങ്ങളും റെക്കോര്ഡ് ഓപ്പണിംഗ് നേടിയെങ്കിലും പിന്നീട് ബോക്സ് ഓഫീസില് പരാജയപ്പെടുകയായിരുന്നു.
ടൊവിനോ തോമസ് നായകനായ ഐഡന്റിറ്റി (2025), സുരേഷ് ഗോപിയുടെ മേ ഹൂം മൂസ എന്നിവയാണ് കോണ്ഫിഡന്റ് ഗ്രൂപ്പ് നിര്മ്മിച്ച മറ്റു പ്രധാന ചിത്രങ്ങള്. മേ ഹൂം മൂസയില് മറ്റു നിര്മ്മാതാക്കള് ഉണ്ടായിരുന്നുവെങ്കിലും നിര്മ്മാണത്തിന്റെ പ്രധാന പങ്കും വഹിച്ചത് റോയ് ആയിരുന്നു. കന്നഡയില് ക്രേസി ലോക , രാധന ഗന്ധ എന്നീ ചിത്രങ്ങളിലും കോണ്ഫിഡന്റ് ഗ്രൂപ്പ് സഹകരിച്ചു. മോഹന്ലാല് നായകനായ ലേഡീസ് ആന്ഡ് ജെന്റില്മാന് എന്ന ചിത്രവും കോണ്ഫിഡന്റ് ഗ്രൂപ്പാണ് നിര്മ്മിച്ചത്. ആശീര്വാദ് സിനിമാസും നിര്മ്മാണത്തില് പങ്കാളികളായിരുന്നു. ഭാവന നായികയാകുന്ന അനോമി ആണ് കോണ്ഫിഡന്റ് ഗ്രൂപ്പ് അവസാനമായി സഹകരിച്ച ചിത്രം. 2026 ഫെബ്രുവരി 6-ന് ചിത്രം റിലീസ് ചെയ്യാനിരിക്കെയാണ് അദ്ദേഹത്തിന്റെ വിയോഗം.
