കണ്ണൂര് രാഷ്ട്രീയത്തിലെ തീപ്പൊരി നേതാക്കള് തമ്മിലുള്ള ശത്രുതയുടെ കഥകള് കേട്ടു ശീലിച്ച കേരളത്തിന് മുന്പില് ഇതാ പുതിയൊരു രാഷ്ട്രീയ നാടകം. സ്വന്തം പാളയത്തിലെ പടലപ്പിണക്കങ്ങള് തീര്ക്കാന് മുഖ്യമന്ത്രി പിണറായി വിജയന് ആയുധമാക്കുന്നത് തന്റെ ബദ്ധവൈരിയായ കെ. സുധാകരനെയാണ്. ജി. സുധാകരന് കാട്ടിയത് ‘ചെറ്റത്തര’മാണെന്ന് ആക്രോശിക്കുമ്പോള്, മാതൃകയാക്കാന് പിണറായിക്ക് മറ്റൊരാളില്ല; അത് കെ. സുധാകരന് തന്നെ!
ആലപ്പുഴയിലെ ചുവപ്പു കോട്ടകളില് ജി. സുധാകരന് നടത്തിയ നീക്കങ്ങള് വഞ്ചനയുടെയും ചതിയുടെയും അങ്ങേയറ്റമാണെന്നാണ് പിണറായിയുടെ പക്ഷം. പാര്ട്ടിയില് തനിക്ക് പ്രത്യേക ഇരിപ്പിടമുണ്ടെന്ന് ജി. സുധാകരന് കരുതേണ്ടെന്നും പ്രസ്ഥാനത്തിന് മുന്നില് എല്ലാവരും വെറും സേവകര് മാത്രമാണെന്നും മുഖ്യമന്ത്രി ഓര്മ്മിപ്പിച്ചു. സീറ്റ് നിഷേധിക്കപ്പെട്ടതിന്റെ പേരില് പാര്ട്ടിയെ വെല്ലുവിളിച്ച് കോണ്ഗ്രസ് പാളയത്തില് അഭയം തേടിയ ജി. സുധാകരനേക്കാള് എത്രയോ ഭേദമാണ് സ്വന്തം പാര്ട്ടിയോട് വിധേയത്വം കാട്ടുന്ന കെ. സുധാകരന് എന്നാണ് പിണറായിയുടെ കണ്ടെത്തല്. ശത്രുവിനെ പുകഴ്ത്തി മിത്രത്തെ കൊല്ലാക്കൊല ചെയ്യുന്ന ഈ തന്ത്രം രാഷ്ട്രീയ കേരളം അമ്പരപ്പോടെയാണ് നോക്കിക്കാണുന്നത്.
രണ്ട് ടേം നിബന്ധനയുടെ പേരില് പ്രമുഖരെല്ലാം മാറിനിന്നപ്പോള് ജി. സുധാകരന് മാത്രം എന്തിനാണ് ഇത്ര ഇളവ് എന്നാണ് പാര്ട്ടി ചോദിക്കുന്നത്. വ്യക്തിയേക്കാള് വലുതാണ് പ്രസ്ഥാനമെന്ന കമ്മ്യൂണിസ്റ്റ് പാഠം ജി. സുധാകരനെ പഠിപ്പിക്കാന് കെ. സുധാകരനെ മാതൃകയാക്കുന്നത് കണ്ണൂര് മോഡല് രാഷ്ട്രീയത്തിലെ പുതിയ അധ്യായമാണ്. കോണ്ഗ്രസ് പിന്തുണയോടെ മത്സരത്തിനിറങ്ങിയ ജി. സുധാകരന് കാട്ടിയത് പൊറുക്കാനാവാത്ത പാതകമാണെന്നും പിണറായി ആഞ്ഞടിച്ചു. പാര്ട്ടിയേല്പ്പിച്ച വിശ്വാസം ചവറ്റുകുട്ടയിലെറിഞ്ഞ സുധാകരന് ഇനി പാര്ട്ടിക്ക് പുറത്താണെന്ന സൂചനയാണ് ഇതിലൂടെ ലഭിക്കുന്നത്.
മറുഭാഗത്ത്, സീറ്റ് കിട്ടാത്തതിന്റെ പേരില് താന് കലാപത്തിനില്ലെന്ന് കെ. സുധാകരന് ആവര്ത്തിക്കുന്നു. മത്സരിക്കാന് ആഗ്രഹമുണ്ടായിരുന്നുവെങ്കിലും പാര്ട്ടി നയത്തെ മാനിക്കുന്നുവെന്നാണ് സുധാകരന്റെ നിലപാട്. ഒരു ആവശ്യം അംഗീകരിക്കാത്തതിന്റെ പേരില് താന് പടിയിറങ്ങിപ്പോകില്ലെന്ന് അദ്ദേഹം പറയുമ്പോള് അത് ജി. സുധാകരനുള്ള കനത്ത പ്രഹരമായി മാറുന്നു. വി.ഡി. സതീശനുമായി തനിക്ക് യാതൊരു കൊമ്പുകോര്ക്കലുമില്ലെന്നും യുഡിഎഫ് ഒറ്റക്കെട്ടാണെന്നും സുധാകരന് വ്യക്തമാക്കുമ്പോള് പിണറായിയുടെ പുകഴ്ത്തലിന് പിന്നിലെ രാഷ്ട്രീയം സുധാകരനും കൃത്യമായി വായിച്ചെടുക്കുന്നുണ്ട്.
സ്വന്തം പാളയത്തിലെ കലാപകാരിയെ ഒതുക്കാന് ശത്രുവിനെ കൂട്ടുപിടിക്കുന്ന പിണറായിയുടെ ഈ അസാധാരണ നീക്കം ജി. സുധാകരന്റെ രാഷ്ട്രീയ മാറ്റത്തിനുള്ള വിമര്ശനമാണ്.
