കോണ്ഗ്രസിനെ ഞെട്ടിച്ച ആ പടലപ്പിണക്കത്തിന് വിരാമം! ശശി തരൂര് ഇനി എങ്ങോട്ട് എന്ന ചോദ്യത്തിന് ഉത്തരമായിരിക്കുന്നു. കെ.സി. വേണുഗോപാലിന്റെ ആ ഒരു ഫോണ് കോള്… അവിടെയാണ് കളി മാറിയത്. ‘വിശ്വപൗരന്’ ഇനി കോണ്ഗ്രസിന്റെ കുന്തമുനയാകും. ‘ജെന്സി കണക്ട്’ വഴി യുവമനസ്സുകളെ കീഴടക്കാന് തരൂര് ഇറങ്ങുമ്പോള് കേരള രാഷ്ട്രീയം ആവേശക്കടലിലാകുന്നു!
കഴിഞ്ഞ കുറച്ചുദിവസങ്ങളായി കോണ്ഗ്രസ് ക്യാമ്പുകള് നിശബ്ദമായിരുന്നു. കൊച്ചി മഹാപഞ്ചായത്ത് വേദിയില് രാഹുല് ഗാന്ധി തരൂരിന്റെ പേര് പരാമര്ശിക്കാതിരുന്നത് വലിയ വിവാദമായി. തിരഞ്ഞെടുപ്പ് സമിതി യോഗങ്ങളില് നിന്ന് തരൂര് വിട്ടുനിന്നു. സി.പി.എമ്മിലേക്ക് അദ്ദേഹം ചേക്കേറുമെന്ന അഭ്യൂഹങ്ങള് വരെ പരന്നു. എന്നാല്, എല്ലാ കണക്കുകൂട്ടലുകളെയും തെറ്റിച്ചുകൊണ്ട് ഒരു ഫോണ് കോള് എത്തി!
എ.ഐ.സി.സി സംഘടനാ ജനറല് സെക്രട്ടറി കെ.സി. വേണുഗോപാല് നേരിട്ട് തരൂരിനെ വിളിച്ചു. പരാതികള് കേട്ടു. കൊച്ചിയില് സംഭവിച്ചത് വെറുമൊരു ‘കമ്മ്യൂണിക്കേഷന് ഗ്യാപ്പ്’ ആണെന്ന് അദ്ദേഹം ബോധ്യപ്പെടുത്തി. പരാതികള് പാര്ട്ടി ഫോറങ്ങളില് പരിഹരിക്കപ്പെടുമെന്നും അര്ഹമായ പരിഗണന നല്കുമെന്നുമുള്ള കെ.സി.യുടെ ഉറപ്പില് തരൂര് വഴങ്ങി. ഇതോടെ മഞ്ഞുരുകി, തരൂര് വീണ്ടും സജീവമാകാന് തീരുമാനിച്ചു.
ഇനി ലക്ഷ്യം 2026 ആണ്. ഭരണത്തുടര്ച്ച ആഗ്രഹിക്കുന്ന എല്.ഡി.എഫിനെ പ്രതിരോധിക്കാന് കോണ്ഗ്രസ് ഇറക്കുന്ന വജ്രായുധമാണ് ശശി തരൂര്. യുവാക്കളെയും പുത്തന് വോട്ടര്മാരെയും ആകര്ഷിക്കാന് ‘ജെന്സി കണക്ട്’ എന്ന സ്പെഷ്യല് ക്യാമ്പയിന്റെ ചുമതല തരൂരിന് നല്കാനാണ് നീക്കം. രാഹുല് ഗാന്ധിയുമായി ചര്ച്ച നടത്തി തരൂര് ഉടന് പ്രചാരണത്തിന്റെ മുന്നിരയിലെത്തും.
കെ.പി.സി.സി അധ്യക്ഷന് സണ്ണി ജോസഫും ഉടന് തരൂരുമായി ചര്ച്ച നടത്തും. പ്രിയങ്ക ഗാന്ധിയും സജീവമായി രംഗത്തുണ്ടാകും. പ്രതിസന്ധികള് തീര്ന്നു, ലക്ഷ്യം അധികാരം മാത്രം! തരൂര് തിരിച്ചുവരുമ്പോള് യു.ഡി.എഫ് ക്യാമ്പുകളില് ഇരട്ടി ആവേശം. പിന്നീട് കോണ്ഗ്രസ് നേതൃത്വവുമായി തരൂര് ചര്ച്ച നടത്തി. രാഹുല് എല്ലാം കേട്ടു. അങ്ങനെ പ്രശ്നം തീര്ന്നു. ‘പരാതികള് തീര്ന്നു, ലക്ഷ്യം അധികാരം.’ കോണ്ഗ്രസിന്റെ ഈ നീക്കം തിരഞ്ഞെടുപ്പില് എന്ത് ചലനമുണ്ടാക്കും? എന്നതാണ് ഇനി അറിയേണ്ടത്.
