കോട്ടയം: പാലാ നഗരസഭയുടെ അധ്യക്ഷ പദവിയിലേക്ക് ദിയ പുളിക്കക്കണ്ടം വരണമെന്ന ആവശ്യവുമായി ബിനു പുളിക്കക്കണ്ടം സംഘടിപ്പിച്ച ‘ജനസഭ’യില് ഭൂരിപക്ഷാഭിപ്രായം. നഗരസഭാ ഭരണത്തില് നിര്ണ്ണായക തീരുമാനമെടുക്കുന്നതിന് മുന്നോടിയായി പൊതുജനങ്ങളില് നിന്ന് അഭിപ്രായം തേടിയ യോഗത്തില്, ദിയയെ ചെയര്പേഴ്സണ് ആക്കുന്നവരെ പിന്തുണയ്ക്കണമെന്നാണ് ഉയര്ന്നുവന്ന പ്രധാന നിര്ദ്ദേശം.
ജനസഭയിലെ ഭൂരിഭാഗം പേരും യുഡിഎഫിനെ പിന്തുണയ്ക്കാനാണ് ആവശ്യപ്പെട്ടതെങ്കിലും ഇരുമുന്നണികളുമായും ചര്ച്ച നടത്തിയ ശേഷമേ അന്തിമ തീരുമാനമെടുക്കൂ എന്ന് പുളിക്കക്കണ്ടം കുടുംബം വ്യക്തമാക്കി. ഇതിന്റെ ഭാഗമായി തിങ്കളാഴ്ച യുഡിഎഫ് നേതൃത്വവുമായും തുടര്ന്ന് എല്ഡിഎഫ് നേതാക്കളുമായും ചര്ച്ചകള് നടത്തും. ചൊവ്വാഴ്ചയോടെ പാലാ നഗരസഭയുടെ ഭാവി നിര്ണ്ണയിക്കുന്ന അന്തിമ പ്രഖ്യാപനം ഉണ്ടാകും.
പാലാ രാഷ്ട്രീയത്തില് പതിറ്റാണ്ടുകളായി സ്വാധീനമുള്ള പുളിക്കക്കണ്ടം കുടുംബം മുന്പ് കെ.എം. മാണിയുടെ വിശ്വസ്തരായിരുന്നു. പിന്നീട് ഇടതുമുന്നണിക്കൊപ്പം ചേര്ന്ന ബിനു പുളിക്കക്കണ്ടത്തിന്, കേരള കോണ്ഗ്രസ് (എം) ഗ്രൂപ്പിന്റെ എതിര്പ്പിനെത്തുടര്ന്ന് അധ്യക്ഷ പദവി നിഷേധിക്കപ്പെട്ടത് വലിയ വിവാദമായിരുന്നു. നിലവില് ജോസ് കെ. മാണി വിഭാഗവും ബിനുവും തമ്മിലുള്ള തുറന്ന പോരാണ് നഗരസഭയിലെ രാഷ്ട്രീയ പ്രതിസന്ധിക്ക് കാരണം.
ഈ സാഹചര്യത്തില് മകള് ദിയയെ മുന്നിര്ത്തി നഗരസഭാ ഭരണം പിടിക്കാനോ അല്ലെങ്കില് അട്ടിമറിക്കാനോ ഉള്ള നീക്കത്തിലാണ് ബിനു. മാണി ഗ്രൂപ്പിനെ വെട്ടിച്ച് യുഡിഎഫുമായി ധാരണയിലെത്തിയാല് പാലാ നഗരസഭയില് വലിയ രാഷ്ട്രീയ മാറ്റങ്ങള്ക്കാകും കേരളം സാക്ഷ്യം വഹിക്കുക. നഗരസഭയില് കേരള കോണ്ഗ്രസ് (എം) അംഗങ്ങളും ബിനു പുളിക്കക്കണ്ടവും തമ്മിലുള്ള പോര് പരസ്യമായ ഒന്നാണ്. ജോസ് കെ. മാണി വിഭാഗത്തിന് ബിനുവിനോടുള്ള വിയോജിപ്പാണ് എല്ഡിഎഫിലെ പ്രധാന പ്രതിസന്ധി.
ആരാണ് ദിയ പുളിക്കകണ്ടം
പാലാ രാഷ്ട്രീയത്തിലെ പ്രമുഖ വ്യക്തിത്വവും നിലവിലെ കൗണ്സിലറുമായ ബിനു പുളിക്കക്കണ്ടത്തിന്റെ മകളാണ് ദിയ. രാഷ്ട്രീയ പാരമ്പര്യമുള്ള പുളിക്കക്കണ്ടം കുടുംബത്തില് നിന്നാണ് ദിയയുടെ വരവ്. ദിയ ഒരു നിയമ ബിരുദധാരിയാണ് (LL.B). അഭിഭാഷക എന്ന നിലയിലുള്ള തന്റെ പ്രൊഫഷണല് പശ്ചാത്തലം രാഷ്ട്രീയ തീരുമാനങ്ങളിലും ഭരണപരമായ കാര്യങ്ങളിലും ഗുണകരമാകുമെന്ന് വിലയിരുത്തപ്പെടുന്നു.
രാഷ്ട്രീയ പ്രവേശനം: പിതാവ് ബിനു പുളിക്കക്കണ്ടത്തിന് പാലാ നഗരസഭയില് കേരള കോണ്ഗ്രസ് (എം) വിഭാഗവുമായുണ്ടായ രാഷ്ട്രീയ തര്ക്കങ്ങളെത്തുടര്ന്നാണ് ദിയയെ മുന്നിര്ത്തിയുള്ള നീക്കങ്ങള് സജീവമായത്. സജീവ രാഷ്ട്രീയത്തില് പുതിയ മുഖമാണെങ്കിലും, ‘ജനസഭ’ പോലുള്ള വേദികളിലൂടെ ദിയയെ ജനങ്ങള്ക്കിടയിലേക്ക് ഉയര്ത്തിക്കാട്ടാനാണ് കുടുംബം ശ്രമിക്കുന്നത്.
നിലവിലെ സാഹചര്യം: പാലാ നഗരസഭയില് ഒരു പ്രത്യേക വാര്ഡിനെ പ്രതിനിധീകരിക്കുന്നതിനേക്കാള്, നഗരസഭാ അധ്യക്ഷ സ്ഥാനത്തേക്ക് (Chairperson) പരിഗണിക്കപ്പെടേണ്ട യുവനേതാവ് എന്ന നിലയിലാണ് ദിയ ഇപ്പോള് വാര്ത്തകളില് നിറയുന്നത്.
