കഠിനാധ്വാനത്തിന്റെ കരുത്തില് സിവില് സര്വീസ് കീഴടക്കി നരുവാമൂടിന്റെ ശ്രീജ. കൂലിപ്പണിക്കാരനായ അച്ഛന്റെയും കുടുംബശ്രീ വായ്പയുടെയും തണലില് 57-ാം റാങ്ക് നേടിയ ഈ വിജയഗാഥ ആര്ക്കും പ്രതീക്ഷ നല്കുന്നതാണ്.
ദാരിദ്ര്യത്തിന്റെ കയ്പുനീരിലും തളരാതെ പൊരുതിക്കയറി നരുവാമൂടിന്റെ പെണ്കൊടി ഐ.എഫ്.എസ് സ്വപ്നങ്ങളിലേക്ക്. കിലോമീറ്ററുകളോളം സൈക്കിള് ചവിട്ടി അച്ഛന് ജയകുമാര് കൂലിപ്പണിയെടുത്തുണ്ടാക്കിയ ഓരോ തുട്ടിലും മകള് ശ്രീജ ജെ.എസ്. കോറിയിട്ടത് സിവില് സര്വീസിലെ 57-ാം റാങ്ക് എന്ന സുവര്ണ്ണ നേട്ടമാണ്. ദാരിദ്ര്യത്തോടും പ്രതിസന്ധികളോടും പടവെട്ടി ആദ്യശ്രമത്തില്ത്തന്നെ ഈ കൊടുമുടി കീഴടക്കുമ്പോള് അത് കണ്ണീരും പുഞ്ചിരിയും കലര്ന്ന ഒരു കഠിനാധ്വാനത്തിന്റെ കഥയാകുന്നു.
ഇന്ത്യന് ഫോറിന് സര്വീസ് ലക്ഷ്യമിടുന്ന ശ്രീജ വെള്ളായണി ലിറ്റില് ഫ്ലവര് സ്കൂള്, നെല്ലിമൂട് സ്കൂള്, പട്ടം സെന്റ് മേരീസ് എന്നിവിടങ്ങളിലെ പഠനത്തിന് ശേഷം മദ്രാസ് ക്രിസ്റ്റ്യന് കോളജില് നിന്നാണ് ബിരുദം നേടിയത്. മെസ് ബില്ലടയ്ക്കാന് പണമില്ലാതെ വലഞ്ഞ നാളുകളില് കുടുംബശ്രീ വായ്പയെടുത്തും കെട്ടുതാലി പണയം വെച്ചും അമ്മ ഷീജ കുമാരി മകള്ക്ക് തണലായി. മദ്രാസിലെ പഠനകാലത്ത് പതിനായിരം രൂപയ്ക്കായി നെട്ടോട്ടമോടിയതും കൈമുറിഞ്ഞിട്ടും കൂലിപ്പണിക്ക് പോയതും അച്ഛന് ജയകുമാര് വിതുമ്പലോടെ ഓര്ത്തെടുത്തു.
എം.എ. ബിരുദധാരിയായ അമ്മയുടെ അക്കാദമിക് പിന്തുണയും അച്ഛന്റെ നിശ്ചയദാര്ഢ്യവുമാണ് ശ്രീജയെ ഈ നേട്ടത്തിലെത്തിച്ചത്. ആര്. ശ്രുതി (18), ബി. ഗോപിക (105), അജയ് രാജ് (109), വി.സി. ശ്രീലക്ഷ്മി (133) എന്നിവര്ക്കൊപ്പം ആദ്യ 150 റാങ്കുകളില് ഇടംപിടിച്ച് മലയാളി തിളക്കം ലോകത്തിന് മുന്നില് ഒരിക്കല് കൂടി തെളിയിച്ചിരിക്കുകയാണ് നരുവാമൂടിന്റെ ഈ അത്ഭുത പുത്രി.
