കേരളം ഉറ്റുനോക്കുന്ന നിയമസഭാ പോരാട്ടത്തിന് മാസങ്ങള് ബാക്കിനില്ക്കെ, സി.പി.എമ്മിന്റെയും ബി.ജെ.പി.യുടെയും കണക്കുകൂട്ടലുകള് തെറ്റിക്കാന് വമ്പന് പ്ലാനുമായി കോണ്ഗ്രസ് ഹൈക്കമാന്ഡ്. മുഖ്യമന്ത്രി പിണറായി വിജയനെ അദ്ദേഹത്തിന്റെ ഉരുക്കുകോട്ടയായ ധര്മ്മടത്ത് തന്നെ തളയ്ക്കാന് വടകര എം.പി ഷാഫി പറമ്പിലിനെയോ കെ.പി.സി.സി അധ്യക്ഷന് കെ. സുധാകരനെയോ രംഗത്തിറക്കാനാണ് നീക്കം. ഇലക്ഷന് സ്ട്രാറ്റജിസ്റ്റ് സുനില് കൊനഗോലുവിന്റെ റിപ്പോര്ട്ടിലെ നിര്ദ്ദേശങ്ങള് അതേപടി നടപ്പിലാക്കാന് ഒരുങ്ങുകയാണ് കോണ്ഗ്രസ്.
മുഖ്യമന്ത്രി പിണറായി വിജയനെ ധര്മ്മടത്ത് പ്രതിരോധത്തിലാക്കിയാല് അത് സംസ്ഥാനമൊട്ടാകെയുള്ള യു.ഡി.എഫ് പ്രവര്ത്തകര്ക്ക് വലിയ ആവേശമാകുമെന്നാണ് ഹൈക്കമാന്ഡ് വിലയിരുത്തല്. മത്സരിക്കാന് ഹൈക്കമാന്ഡ് പച്ചക്കൊടി കാട്ടിയ ഷാഫി പറമ്പിലും കെ. സുധാകരനും കണ്ണൂരില് തന്നെ ജനവിധി തേടും. ഷാഫി പറമ്പില് ധര്മ്മടത്ത് എത്തുന്നതോടെ യുവാക്കളുടെയും നിഷ്പക്ഷ വോട്ടര്മാരുടെയും വലിയൊരു നിര യു.ഡി.എഫിനൊപ്പം നില്ക്കുമെന്ന് കൊനഗോലു റിപ്പോര്ട്ട് ചൂണ്ടിക്കാട്ടുന്നു. രണ്ടാഴ്ചയ്ക്കുള്ളില് വിജയസാധ്യത കൂടുതലുള്ള 50 മണ്ഡലങ്ങളിലെ സ്ഥാനാര്ത്ഥികളെ പ്രഖ്യാപിച്ച് പ്രചാരണത്തില് മുന്തൂക്കം നേടാനാണ് നീക്കം. നിയമസഭാ തിരഞ്ഞെടുപ്പിന് മുന്നോടിയായി പാര്ട്ടി ഘടനയിലും വലിയ മാറ്റങ്ങള്ക്ക് കോണ്ഗ്രസ് ഒരുങ്ങുന്നു.
നിലവിലെ അധ്യക്ഷന് സണ്ണി ജോസഫ് പേരാവൂര് മണ്ഡലത്തില് സ്ഥാനാര്ത്ഥിയാകുന്നതോടെ കെ.പി.സി.സി അധ്യക്ഷ പദവി പത്തനംതിട്ട എം.പി ആന്റോ ആന്റണിക്ക് കൈമാറാന് നീക്കമുണ്ട്. കേരള കോണ്ഗ്രസ് (എം) മുന്നണിയിലെത്തിക്കാനുള്ള ശ്രമങ്ങള് പരാജയപ്പെട്ട പശ്ചാത്തലത്തില്, മധ്യകേരളത്തിലെ ക്രൈസ്തവ വോട്ടുകള് സമാഹരിക്കാന് ആന്റോ ആന്റണിയുടെ നേതൃത്വം ഗുണകരമാകുമെന്ന് ഹൈക്കമാന്ഡ് കരുതുന്നു. വിവിധ സഭകളുമായുള്ള അദ്ദേഹത്തിന്റെ അടുത്ത ബന്ധം പത്തനംതിട്ട, കോട്ടയം, ഇടുക്കി ജില്ലകളില് യു.ഡി.എഫിന് കരുത്താകും.
ഷാഫി പറമ്പിലിന് താല്ക്കാലിക ചുമതല നല്കാന് ആലോചനയുണ്ടായിരുന്നെങ്കിലും, ന്യൂനപക്ഷ പ്രീണനം എന്ന ഇടത് പ്രചാരണത്തെ തടയാന് ക്രൈസ്തവ മുഖമായ ആന്റോ ആന്റണിയെ തന്നെ കൊണ്ടുവരാനാണ് എ.ഐ.സി.സി താല്പര്യപ്പെടുന്നത്. ഷാഫി വടക്കന് കേരളത്തിലെ മറ്റൊരു നിര്ണ്ണായക മണ്ഡലത്തില് കൂടി ശ്രദ്ധ കേന്ദ്രീകരിക്കും. ദേശീയ രാഷ്ട്രീയത്തേക്കാള് കേരളം തിരിച്ചുപിടിക്കുക എന്ന ഒറ്റ ലക്ഷ്യത്തിലേക്ക് കോണ്ഗ്രസ് കേന്ദ്രീകരിക്കുന്നതോടെ വരും ദിവസങ്ങളില് വമ്പന് പ്രഖ്യാപനങ്ങള് ഉണ്ടാകുമെന്ന് ഉറപ്പായി.
