കേരള രാഷ്ട്രീയത്തിലെ രണ്ട് കരുത്തുറ്റ ധ്രുവങ്ങളായിരുന്ന വി.എസ്. അച്യുതാനന്ദനും ഉമ്മന്ചാണ്ടിയും ഇല്ലാത്ത ആദ്യ നിയമസഭാ തിരഞ്ഞെടുപ്പിനാണ് 2026 കളമൊരുങ്ങുന്നത്. ദശാബ്ദങ്ങളോളം കേരള രാഷ്ട്രീയത്തെ നയിച്ച ഈ രണ്ട് ജനനായകരുടെ അസാന്നിധ്യം വലിയൊരു ശൂന്യതയാണ് മുന്നണികളില് സൃഷ്ടിച്ചിരിക്കുന്നത്. അതുകൊണ്ട് തന്നെ ‘മുന് മുഖ്യമന്ത്രിമാര്’ ആരും തന്നെ മത്സരിക്കാത്ത ഒരു തിരഞ്ഞെടുപ്പായി ഇത് മാറിയേക്കാം.
നിലവില് ജീവിച്ചിരിക്കുന്ന മുന് മുഖ്യമന്ത്രിമാരില് എ.കെ. ആന്റണി സജീവ രാഷ്ട്രീയത്തില് നിന്നും മത്സരിച്ചുള്ള പോരാട്ടങ്ങളില് നിന്നും നേരത്തെ തന്നെ പിന്വാങ്ങിയിട്ടുണ്ട്. വി.എസ്. അച്യുതാനന്ദന് വിടവാങ്ങി. അന്തരിച്ച ഉമ്മന്ചാണ്ടിയുടെ അസാന്നിധ്യം യുഡിഎഫിനെ സംബന്ധിച്ചിടത്തോളം വലിയൊരു വൈകാരിക നഷ്ടമാണ്. ഇതോടെ, വരാനിരിക്കുന്ന തിരഞ്ഞെടുപ്പില് മുന്പ് മുഖ്യമന്ത്രി പദവിയില് ഇരുന്നവര് ആരും തന്നെ സ്ഥാനാര്ത്ഥി പട്ടികയില് ഉണ്ടാകില്ലെന്ന് ഉറപ്പായിക്കഴിഞ്ഞു.
ഇനി രാഷ്ട്രീയ കേരളം ഉറ്റുനോക്കുന്നത് മുഖ്യമന്ത്രി പിണറായി വിജയന്റെ തീരുമാനത്തിലേക്കാണ്. പിണറായി വിജയന് ഇത്തവണ മത്സരിക്കുമോ എന്ന കാര്യത്തില് സി.പി.എം സംസ്ഥാന നേതൃത്വം ഉടന് തീരുമാനമെടുക്കും. പാര്ട്ടിയില് എഴുതപ്പെടാത്ത ‘രണ്ട് ടേം’ നിബന്ധന ഉണ്ടെങ്കിലും മുഖ്യമന്ത്രിയുടെ കാര്യത്തില് പ്രത്യേക ഇളവ് നല്കാന് സാധ്യതയുണ്ട്. എന്നാല്, ഏതെങ്കിലും സാഹചര്യത്തില് പിണറായി വിജയന് മത്സരിക്കേണ്ടതില്ല എന്ന് പാര്ട്ടി തീരുമാനിച്ചാല്, മുഖ്യമന്ത്രി കസേരയില് ഇരുന്ന ഒരാള് പോലും മത്സരരംഗത്തില്ലാത്ത ആദ്യ തിരഞ്ഞെടുപ്പായി 2026 മാറും.
ഇ.കെ. നായനാര്, കെ. കരുണാകരന്, സി.എച്ച്. മുഹമ്മദ് കോയ, പി.കെ. വാസുദേവന് നായര് തുടങ്ങിയ മഹാരഥന്മാര് നയിച്ച കേരള രാഷ്ട്രീയത്തില്, മുന് മുഖ്യമന്ത്രിമാര് മത്സരരംഗത്ത് ഇല്ലാത്ത സാഹചര്യം ഒരു വലിയ തലമുറ മാറ്റത്തിന്റെ സൂചന കൂടിയാണ്. പിണറായി മത്സരിച്ചാല് പോലും, അദ്ദേഹം ‘മുന്’ മുഖ്യമന്ത്രി എന്ന നിലയിലല്ല, മറിച്ച് നിലവിലെ മുഖ്യമന്ത്രി എന്ന നിലയിലാകും ജനവിധി തേടുക. ചുരുക്കത്തില്, പഴയ തലമുറയിലെ കരുത്തരായ മുന് മുഖ്യമന്ത്രിമാര് ഇല്ലാത്ത ഒരു പുത്തന് രാഷ്ട്രീയ പോരാട്ടത്തിനാണ് 2026 ജനുവരിയില് കേരളം സാക്ഷ്യം വഹിക്കുന്നത്. ഇതൊരു തലമുറമാറ്റമാണ്.
കേരള പിറവിയ്ക്ക് ശേഷം ആദ്യം മുഖ്യമന്ത്രിയായത് ഇഎംഎസ് നമ്പൂതിരിപ്പാടാണ്. പിന്നീട് പട്ടം താണുപിള്ള. അതിന് ശേഷം ആര് ശങ്കര്, സി അച്യുതമേനോനും കെ കരുണാകരനും എകെ ആന്റണിയും പികെ വാസുദേവന് നായരും ഇകെ നയനാരും കേരളത്തിന്റെ മുഖ്യമന്ത്രിയായി. 2006ലായിരുന്നു ഈ തലമുറയില് നിന്നും മുഖ്യമന്ത്രി പദം ഉമ്മന്ചാണ്ടിയിലേക്ക് എത്തിയത്. പിന്നീട് വിഎസ് അച്യുതാനന്ദന്റെ ഊഴം. നിലവില് പിണറായിയും. ഈ പട്ടികയില് ആന്റണിയും പിണറായിയും മാത്രമാണ് അവശേഷിക്കുന്നത്. ഇതില് ആന്റണി മത്സരിക്കില്ല. പിണറായിയില് മത്സര സാധ്യത കൂടുതലും.
